Tag Archives: යුද්ධය

(පශ්චාත්) නූතන දෘෂ්ටියෙන් ‘සිංහල ගම’ දෙස බැලීම – කුමුදු කුසුම් කුමාර

මේ මගේ සඳයි, පුරහඳ කළුවර, සුළඟ එනු පිණිස චිත්‍රපට පිළිබඳ කියැවීමක්සමකාලීන සිංහල සිනමාවේ ආන්දෝලනයට තුඩුදුන් චිත්‍රපට (මේ මගේ සඳයි, පුරහඳ කළුවර, සුළඟ එනු පිණිස) තුනක් නිර්මාණය කළ අශෝක හඳගම, ප්‍රසන්න විතානගේ සහ විමුක්ති ජයසුන්දර යන අධ්‍යක්ෂවරුන් තිදෙනාම එම චිත්‍රපට වලට පසුබිම කර ගත්තේ ‘සිංහල ගම’යි. එහෙයින් මෙම චිත්‍රපට සිංහල ගම පිළිබඳ කතාබහක් සමාජය තුළ ඇති කළේය.

මෙම කතාබහට මුල් වූ අදහසක් වූයේ, ඇතමුන් කියන පරිදි යහපත් ගති පැවතුම් ඇති හැදියාවක් ඇති මිනිසුන් ගැහැණුන් වසනා සිංහල ගමක් ලංකාවේ නැති බව මේ චිත්‍රපට වලින් පෙන්වා දෙන බවයි. සිංහල ගම පිළිබඳ පවතින සම්ප්‍රදායික චිත්‍රය මිථ්‍යාවක් බවයි. මේ අදහස පිළිබඳ දීර්ඝ විග්‍රහයක් අපි මීට පෙර ‘මේ මගේ සඳයි’ මුල් කරගෙන ඉරිපත් කර ඇත්තෙමු.

මෙම ලිපියේ අරමුණ මෙම නව පරපුරේ අධ්‍යක්ෂවරුන් තම මුල් චිත්‍රපටි සඳහා සිංහල ගම මුල් කරගන්නේ මන්ද යන්න පිළිබඳ කියැවීමක් ඉදිරිපත් කිරීමයි. Continue reading (පශ්චාත්) නූතන දෘෂ්ටියෙන් ‘සිංහල ගම’ දෙස බැලීම – කුමුදු කුසුම් කුමාර

“ප්‍රායෝගිකබව” ගේන්නේ බුද්ධාගමට තියන වරප්‍රසාද රකින්න – මහාචාර්ය අර්ජුන පරාක්‍රම

” ව්‍යවස්ථාව කාටද?” යන මැයෙන් ජුනි 22 දින පුරවැසි සභාව සංවිධානය කොට සාමයික කේන්ද්‍රයේ ශ්‍රවණාගාරයේ පැවති මහජන සාකච්ඡාවේදී මහාචාර්ය අර්ජුන පරාක්‍රම වාර්තාවේ (ආණ්ඩුක්‍ර‍ම ව්‍යවස්ථා සංශෝධන පිළිබඳ මහජන අදහස් විමසීමේ කමිටුව) විවෘතභාවය පිළිබඳ සිහිපත් කරමින් අදහස් දැක්වීම ආරම්භ කළ අතර ඔහු මෙහිදී වාරණය හා ස්වයංවාරණය පිළිබඳ ප්‍රශ්නය එනම් හමුදාකරණය , යුද්ධය සහ යුද්ධය නිසා වූ මානව හිමිකම් කඩවීම ගැන කිසිවක් කතා නොකිරීමට හැකිවීම ගැන මතු කළේය.
ඔහු වැඩිදුරටත් පෙන්වා දුන්නේ මෙම මහජන අදහස් විමසීමේ ක්‍රියාවලිය තුළ ප්‍රායෝගිකත්වය යන සංකල්පය මතු වන්නේ භයානක ආකාරයකට බවයි.එනම් එම වචනය මෙහි භාවිතා කර ඇත්තේ වරප්‍රසාදලත් කොටසට ඒ සම්බන්ධයෙන් ක්‍රියා කිරීමට අපහසු වන විටය.විශේෂයෙන්ම 4 වෙනි වගන්තියේ දී බුද්ධාගම පිළිබඳ කතා කරන විට මෙය පැන නැගෙන බව ඔහු පෙන්වා දුන්නේය.

Prof.Arjuna Parakrama expressed his views on “Constitution: For Whom ?” at the public discussion organized by ‘Citizens’ Council’ held on 22 June 2016 at CSR auditorium. Continue reading “ප්‍රායෝගිකබව” ගේන්නේ බුද්ධාගමට තියන වරප්‍රසාද රකින්න – මහාචාර්ය අර්ජුන පරාක්‍රම

ජාතික ආරක්ෂක රාජ්‍යයක් ගොඩ නැංවීම නවතාලිය යුතුය – කුමුදු කුසුම් කුමාර

විපක්ෂයේ පොදු අපේක්ෂකයාගේ වැඩ පිළිවෙල තුලින් මතුවන ගැටලු දෙකක් කෙටියෙන් මතු කරමින් මෙම ලිපිය අරඹමි.

පළමුව, විපක්ෂය විසින් අත්සන් කළ පොදු මහජන න්‍යාය පත්‍ර යේ සඳහන් වන වසර දෙකකට නොඅඩු කාලයක් සඳහා සර්ව පාක්ෂික ආණ්ඩුවක් පිහිටුවීමේ යෝජනාව රාජපක්ෂ රෙජීමය යටතේ පැවතියාක් මෙන් විපක්ෂ දේශපාලනය මර්ධනය කිරීමේ වැඩ පිළිවෙලක් නොවන්නේ කෙසේද යන්න පොදු අපේක්ෂක ව්‍යාපාරය විසින් පැහැදිළි කළ යුතුය. ජාතික ඒකාබද්ධතාව ගොඩ නැංවීමේ යහපත් අරමුණ වෙනුවෙන් හෝ වුව දේශපාලනය විසම්මුතිය, විවේචනය සහ විරෝධය යටපත් කිරීම සිදු නොවිය යුතුය. එසේ වුව හොත් එය පොදු අපේක්ෂක ව්‍යාපාරයේ මූලික අරමුණ වන බහු පක්ෂ දේශපාලනය අත්‍යවශ්‍ය අංගයක් වන පාර්ලිමේන්තු ප්‍රජාතන්ත්‍රවාදය යළි ස්ථාපිත කිරීමේ අපේක්ෂාවට එරෙහිව යාමකි.

දෙවනුව, යටිතල පහසුකම් දියුණු කිරීම මුල් කර ගත් ආර්ථික සංවර්ධන කටයුතු දූෂනයෙන් තොරව දිගටම ගෙන යන බවට පොදු අපේක්ෂකයා ගේ ව්‍යාපාරයෙන් ලැබෙන සහතිකය ස්ථාරවභාවය පිළිබඳ හැඟීමක් ඇති කරයි. නමුත් ආර්ථික සංවර්ධන කටයුතු දූෂනයෙන් තොර වනවා පමණක් නොව එය ජනතා හිතකාමී අරමුණින් සහ ජනතාවට අසාධාරණයක් අයුක්තියක් නොවන ආකාරයෙන් ද සිදු කළ යුතුය. සංවර්ධනය සඳහා යැයි කියමින් නගරයේ සහ පළාත් බද ජනයා ගේ ඉඩම් කොල්ල කෑම වහා නවතා ලිය යුතු ය. නගරයේ අඩු ආදායම්ලාභීන් ගේ ජීවනෝපායයන් සහ සාමූහික සමාජීය ජීවිතය කඩා බිඳ දමමින් ඔවුන් තමන් ගේ පාරම්පරික නිවාස වලින් බලහත්කාරයෙන් ඉවත් කොට ඔවුන් ට පිළිගත නොහැකි තත්වයන් සහ දැරිය නොහැකි වියදම් යටතේ මිලිටරි බලය පවා යොදමින් මහල් නිවාස වල පදිංචි කරවීම නවත්වා ලිය යුතුය. මෙලෙස විවිධ ආකාරයන්ගෙන් අසාධාරණයන්ට ලක් වී සිටින ජනයාට සාධාරණය සහ යුක්තිය ඉටු කළ යුතුය. සංවර්ධනයේ නාමයෙන් අධ්‍යාපනයේ බර දෙමව්පියන්ට පැටවීමෙන් ජනයා නිදහස් කොට සියලු දෙනාට අධ්‍යාපනයේ අයිතිවාසිකම සමව ලැබෙන පරිදි අධ්‍යාපනයේ වගකීම රජය විසින් භාරගත යුතුය.

විපක්ෂය වත්මන් පාලක රෙජීමය ගැන කරන විවේචන අයහපාලනය ගැන ඒවා වන බවත් ඊට විසඳුම රාජ්‍ය යේ ව්‍යුහය සහ පද්ධතිය හෝ රාමුව වෙනස් කිරීම නොවන බවත් ඇතැමුන්ගේ තර්කයයි. රාජ්‍යය රටක ජනයාට ආරක්ෂාව සැපයීම මිස යහපාලනය අරමුණ කර නොගන්නා බව සැබැවි. සාමාන්‍ය යෙන් ගත්කළ ජනාධිපතිවරණය නව ආණ්ඩුවක් පත් කර ගැනීමේ අවස්ථාව නොවන බවද සැබැවි.

නමුත් ජනාධිපතිවරණය ආණ්ඩුව වෙනස් කිරීම සඳහා වන මුල් පියවර ලෙස මෙම අවස්ථාවේ සළකන්නට ලාංකිකයන් පෙළඹී ඇත්තේ ආණ්ඩුවේ කර අඹා එය විධායක ජනාධිපති තනතුරේ විය ගසට බැඳ ගැනීමේ හේතුවෙනි, ජන මතය ප්‍රකාශ වන පරිදි ආණ්ඩුව වෙනස් කරන්නට නම් පළමුව විධායක ජනාධිපති ක්‍රමය අහෝසිකිරීම අත්‍යවශ්‍ය වී ඇති හෙයිනි. Continue reading ජාතික ආරක්ෂක රාජ්‍යයක් ගොඩ නැංවීම නවතාලිය යුතුය – කුමුදු කුසුම් කුමාර

ආයෙමත් යුද්ධය ඇති වෙයිද? කුමුදු කුසුම් කුමාර

2man-tm

ජනාධිපති මැතිවරණය ප්‍රකාශයට පත් කිරීමත් සමග උදා වූ දේශපාලන නිදහසේ අවකාශය ලංකාවේ සමාජයට නව ජීවයක් ගෙන දුන්නා වැනිය. යහපත් වෙනසක් පිළිබඳ බලාපොරොත්තුවෙන් මුලු සමාජයම පිබිදී ඇළලී ගොස් ඇත. හැමතැනම හැමෝගේම දවසේ ප්‍රධාන මාතෘකාව දේශපාලන යයි. පසුගිය දිනවල උණුසුම් කතා බහ වූයේ ‘කවුද අලුතෙන් පැන්නෙ?‘ යන්නයි. නමුත් දැන් වන විට එය දේශපාලනඥයන්ගේ මිල ගණන් වලින් අදහස් වලට ප්‍රතිපත්තිවලට පුරවැසි සාකච්ඡාවට මාරු වී තිබේ. මේ සාමාන්‍ය පුරවැසියා දේශපාලනයට සක්‍රීයව යොමුවන මොහොතයි.

ඡන්දදායකයන් විසින් පොදු අපේක්ෂක මෛත්‍රීපාල සිරිසේන අනාගත ජනාධිපතිවරයා ලෙස බැරෑරුම්ව සළකා බැලීම දැන් ඇරඹී තිබේ. ප්‍රචණ්ඩත්වයෙන් බිය වැදී ගොස් තිබුණු අප සමාජය මත ජාතික නායකයෙක් ලෙසින් මෛත්‍රීපාල සිරිසේන ගේ ආගමනය ඇති කළේ සිත පහන් කරවන සුළු වෙනසකි. මෛත්‍රීපාල සිරිසේන 1977 සිටම සමාජය ප්‍රචණ්ඩත්වයෙන් පෙළන දේශපාලනයකට නායකත්වය දුන් නායකයන් ගේ මර්ධනකාරී පාලනයන් යටතේ හෙම්බත්ව සිටි සමාජයක් සුවපත් කරන මැදහත් ස්වභාවයක් ප්‍රකට කරන නායකයෙකු වීම ජනතාවගේ අපේක්ෂාවන් සමග ගැළපෙයි. යුද්ධය නිමාවෙන් පසු අප අපේක්ෂාවෙන් සිටි සාමය පමා වී හෝ දැන්වත් සැබෑ කර ගත හැකිය යන බලාපොරොත්තුව ඉන් ඇතිවිය.

ඒ අතරතුර රෙජීමය මහජනයා තුළ යුද බිය ඇති කිරීමේ උත්සාහයක නිරතව සිටියි. හිඟන්නාගේ තුවාලය මෙන් යලිත් යුද්ධය ඇති වීමේ අනිසි බිය විකුණා සිංහලයාගේ ඡන්දය ගැනීමට රෙජීමය උත්සාහ කරයි.

ගෝටාභය රාජපක්ෂ ලංකාවේ එල්ටීටීඊ ත්‍රස්තවාදය සහමුලින්ම පරාජය කර ඇතැයි කියයි. ඒ අතරම පුනරුත්ථාපනය කළ එල්ටීටීඊ සාමාජිකයන් වෙතින් සහ සහ විදේශගතව විසිරී සිටින දෙමළ ප්‍රජාව මගින් යලි එල්ටීටීඊ ත්‍රස්තවාදය පැණ නැගීම පිළිබඳ බිය ජනයා තුළ ඇති කරන්නට රෙජීමය උත්සාහ ගනියි.

මෙලෙස ලංකාවේ දේශපාලනයට අත පෙවීමට විදේශ ගතව සිටින එල්ටීටීඊ සාමාජිකයන් උත්සාහ ගැනීමට ඇති විසඳුම රටේ දරදඬු ඒකාධිපති පාලනයක් ගෙන යාම සහ සිවිල් සමාජය මිලිටරීකරණය කිරීම නොවේ. කළ යුත්තේ උතුරු නැගෙනහිර දෙමළ ජනයාට බියෙන් තොරව තමන් ගේ දෛනික කටයුතු සහ තමන් වසන පලාත් වල පරිපාලනය නිදහසේ කරගෙන යා හැකි පරිසරය ඇති කිරීමයි. ඔවුනට පූර්ණ දේශපාලන නිදහස ලබා දීමයි. එම ප්‍රදේශවල හමුදා මර්ධනය වෙනුවට සිවිල් පාලනය තහවුරු කිරීම යි. ඔවුනට තමන්ගේ පාරම්පරික වාසස්ථානවල යලි පදිංචියට යාමට ඇති අයිතිය තහවුරු කිරීම යි. උතුරු නැගෙනහිර දෙමළ දේශපාලන සංවිධාන සමග දකුණේ රජය සහයෝගයෙන් කටයුතු කිරීම යි.

රෙජීමයේ බළල් අතක් බව පැහැදිළිව පෙනෙන්නට තිබෙන කිසිම බෞද්ධ කමක් ගෑවිලාවත් නැති ඊනියා බොදු බල සේනාව මුස්ලිම් ජනයා පොදු අපේක්ෂකයාට ඡන්දය දුන හොත් මුස්ලිම් විරෝධී කෝලාහල ඇතිවනු ඇතැයි ප්‍රකාශ කොට ඇත. එලෙස නින්දිත ආකාරයෙන් මුස්ලිම් ජනයා බිය වැද්දීමට ගන්නා උත්සාහය පෙන්නුම් කරන්නේ ඡන්දය දිනීම සඳහා ජාතිවාදය අවුස්සන්නට රෙජීමය නොපැකිළෙන බවයි. මෙය කිසිසේත්ම බෞද්ධ පිළිවෙතක් නොවේ.

සංවර්ධනය සහ ජාතික ආරක්ෂාව සඳහා රටේ ස්ථාවරභාවය අවශ්‍ය යැයි ද ඒ සඳහා විධායක ජනාධිපතික්‍රමය පමණක් නොව ඒකාධිපති පාලනයක් අවශ්‍ය යැයි කියන්නට පවා වත්මන් රෙජීමය පටන් ගෙන ඇත. ඒකාධිපති පාලනයක් අවශ්‍ය කෙරෙන සංවර්ධනය ජනතා හිතකාමී සංවර්ධනයක් විය නොහැකිය. මන්ද ඒකාධිපති පාලනයක් අවශ්‍ය වන්නේ ජනතාව මත බලෙන් පැටවෙන අසාධාරණ සහ අයුක්ති සහගත වැඩ පිළිවෙලවලට ජනතාව පළ කරන විරෝධයන් මර්ධනයට හෙයිනි.

වත්මන් රෙජීමය යළිත් බලයට පැමිණිය හොත් අපගේ ජීවිත වලට අත් විය හැකි ඵල විපාක ගැනද අප විමසිලිමත් විය යුතුය. රෙජීමයේ විදේශ සහ දේශීය ණය බරින් ගැළවීම සඳහා ජාත්‍යන්තර මූල්‍ය අරමුදල සහ ලෝක බැංකුව ඇතුළු ණය දෙන ආයතන වල කොන්දේසි ඉටු කිරීමට රෙජීමය නොපැකිලෙනු ඇත. එසේ වුව හොත් දැනට සේවක විරෝධය නිසා නවතා ඇති රාජ්‍ය ආයතන සහ බැංකු යනාදිය පෞද්ගලීකරණය කිරීම ඉතා කඩිනමින් කෙරීමට නියමිත බව එම ආයතන වල සේවකයන් වටහා ගත යුතුය. තවද, ඉඩම් මංකොල්ලය මිලිටරීකරණය යටතේ වේගවත් කෙරෙනු ඇත. දුප්පතුන් පමණක් නොව අනෙක් සමාජ පංති වල ජනයාටද රෙජීමයේ හිතුමතයට අනුව විදේශික සමාගම්වලට විකිණීම ට තමන් ගේ ඉඩම් මංකොල්ල කෑමට රජයට ඉඩ දී බයිනේත්තුවේ බලයට යටත් වීමට සිදුවනු ඇත.

දැනටමත් සාමාන්‍ය ජනයා මත පනවා ඇති ආහාර පාන පාරිභෝජන භාණ්ඩ සහ සේවා යනාදියට පනවා ඇති අධික බදු බර තව තවත් වැඩි කෙරෙනු ඇත. ජනාධිපතිවරණය ඉලක්ක කොට ගෙන අය වැයෙන් දුන් සහන සහ ජනාධිපතිවරණයේ ප්‍රචාරණ කටයුතු වෙනුවෙන් සහ ඡන්දදායකයා මිලට ගැනීමට අල්ලස් වශයෙන් කෙරෙන විවිධ භාණ්ඩ බෙදා හැරීම් වෙනුවෙන් වැය කරන සියලු මුදල් යළි අය කර ගැනීම සඳහා බදු අධික ලෙස ඉහල නැංවෙනු ඇත.

මේ පුරවැසියා විසින් තම දරුවන්ගේ අනාගතය වෙනුවෙන් යහපත් රටක් ඉතිරි කිරීම සඳහා කල්පනාවෙන් තීරණයක් ගත යුතු කාලය යි.